Kuhusu Gazeti La Enendeni

Ni gazeti la kimisionari, lililosajiliwa na Idara ya Habari, Dar Es Salaam, tarehe 12 Machi, 2007. Mkurugenzi wa kwanza kabisa alikuwa padri Gian Treglia. Lakini mapadri Salutaris Massawe, Francesco Bernardi, Paulino Madeje na Michael Mille na wamefanya kazi pia katika gazeti hilo....

Chombo hiki cha habari kinaongozwa na sera, dira na dhima maalum, ambavyo vimesaidia katika kukiwezesha kufanikiwa katika malengo yake. Lakini pia kuna changamoto na matarajio, ambavyo vinatakiwa kufanyiwa kazi. Bila kuingia kiundani kuhusu mwanzo wake (jambo muhimu pia kulifahamu), gazeti hili lina malengo yafuatayo:
Mosi: kuhamasisha moyo wa kimisionari katika jumuiya ya wakristo waliopo Tanzania, hasa kwa njia ya kuonyesha kazi za kimisionari zinazofanyika nchini na duniani kote.
Pili: kuunganisha watu wa itikadi na misimamo mbalimbali kupitia mazungumzo, ili uhusiano mwema ujengeke kati ya jamii ya Tanzania na ya dunia nzima.
Tatu: kutangaza Injili ya Yesu Kristo kwa wale wanaopenda kuimarisha imani yao ya kikristo kupitia tafakari zake.
Nne: kuelimisha watu juu ya mambo mbalimbali kama vile maendeleo, haki na amani, maisha ya kijamii, n.k, kadiri ya mtazamo wa Injili.
Tano: kuhamasisha miito ya upadre, utawa na umisionari.

UANDAAJI (PRODUCTION)
Gazeti hili huandaliwa kwa kuchota makala mbalimbali kutoka vyanzo mbalimbali. Kama ilivyoelezwa kabla, mada ni za malezi katika nyanja anuwai, zikitiliwa ladha ya kiinjili. Mchakato wa kulipatia sura (layout and design) hufanyika katika ofisi za chombo hiki cha mawasiliano.

USAMBAZAJI
Njia kadhaa zinatumika katika kulisambaza Enendeni. Lakini iliyo kuu ni ile kupitia shirika la Posta. Magazeti mengine hutumwa kupitia watu mbalimbali wanaoelekea sehemu ambako gazeti hilo linatakiwa kufika.